مارايكن في مشكلتي ؟؟؟؟؟

بعد التحية والسلام .......اكتب اليكن اخواتي الغاليات طارحة لكن مشكلتي عساني اجد حلا او اقتراحا عندكن



ولقد ترددت كثيرا قبل طرحها لكني عرفت واقتنعت انه ماخاب من استخار ولاندم من استشار ورايكن يفيدني اكيد ....وابدا بكن قبل غيركن من اخواتي ...حتى الحقيقيات لم اطرح عليهن سؤالي




مشكلتي بدات منذ ايام او اشهر ........وابدا من البداية

حيث كنت اعيش في بيتي مع زوجي وكانت شقة بسيطة F3 [b]وكان اخي يسكن في بيت اهلي والذي جميع فراده يقطنون بفرنسا ...زوجة اخي رفضت تواجدنا من الصيف للصيف عند عودة الاهل ومن ثم قرر اخي مغادرة البيت والرحيل بعيدا تزامن ذلك مع توفره لعمل ممتاز في العاصمة ....يعني بقى بيت اهلي فارغ ....عام كامل والجميع يحاولني ويتوسل الي السكن فيه وانا كنت ارفض ...وعام كراوه للناس والعام الماضي قررت انا وزوجي السكن فيه بحكم اني كنت الوحيدة المتواجدة في هذه الولاية والباقين في ولايات بعيدة او بالخارج ...وكنت انا يلي ترعاه من قبل يعني نظافة وتحضير قبل عودة الاهل ....المهم سكنا فيه عام كامل وكانت عندنا قطعة ارض بعنا الابرتمان وبدينا في البنية ...ونص العام هذا قرر فجاة اخي العودة ...وتخيلو رواحكم مكاني ...زوجتو صعيبة بزااااااااف بزاااااف تموت على المشاكل ...مش مشكل قلنا كل واحد وطابقو منين يوجدو دياري نروح على اساس انو في الصيف نمشي ويوجدو ...وترجي الرياح بما لاتشتهي السفن ....زادت السما في السومة وزادو العمال تاني يلي كانو ميسواوش ولاو طبا ضرك ....المهم خلاصة القول انو مستحيل يوجدو دياري ضرك


المشكل وين انو خويا احكم الطابق التحتاني وانا صعدت للفوقاني منين كل اهلي يروحو لعندي ...الطابق الاخر ماشي مكمل ....راجلي صعيب في عقليتو ...مزير وميحبش الخلطة ...وخواتاتي فيهم الجلبابيات يلي ميحبوش يتلقاو معاه خلاص وفيهم يلي تحب حريتها تماما في الخرجة والدخلة منين جي وهو شوية يعلق ...وزيد الضياف ولاد عمامي وخوالي ...وهاكم تعرفو لازيميقري ....وفوق هذا كامل مرت خويا وولاتدها يلي دحسوني نتاع الصح من الصباح وهما عندي مبقالي سر مبقالي قعاد مبقاتلي راحة طول النهار طالعة نازلة وولادها كي العفرت والله ميخليو حاجة في بلاستها ...


ضرك دبرو علي عندي حلان لاثالث لهما

اما اني نكبر قلبي ونعفس عليه ونكمل عام وحداخر هنا ....وحسوا واش يصرى في


واما اننا نرجعو لواحد الدار كانت عندنا من بكري نتاع زوجي بصح في العرش مكان الانترنت مكان هاتف واقرب مدرسة تبعد الكيلومترات .... يعين واش تقولو ندي ولادي يسوفريو ولانسوفري انا ولا واش نعمل


والله غير راني في حيرة ميعلم بيها غير ربي سبحانو


هربت ليكم بعد ربي وقولولي واش نعمل ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

شكرا ام توبه على ثقتك في المنتدى
عندي سؤال قولي هدا بيت اهلك هو بيت والديك ما فهمتش ام بيت الوراثة... مشكلتك لا تختلف عن مشكل في عائلتي،، لكن انا تاعي تكمل في دار الوراثه تاع جدي المهم .........
انا نصيحتي ليك اصبري يا اختي من اجل اولادك ،، على الاقل يكملوا دراستهم و ما تخربطش عليهم الاجواء،،، انت و زوجك كبار قادريين تصبروا معظم الناس عندها مشاكل كيما هده خاصه تاع العفيس هههه..
ادا كان هدا البيت تاع ابوك عندك حق تبقاي فيه و زوجه اخيك ماعندهاش حق تتكلم انت الاقرب لا هي ،،
اما من ناحية زوجك مايحبش الخلطه و قلتي راهو يعلق لازم تتكلمي معاه بهدوء حتى تحل مشكلتكم
ربي يفك كربك ، و يسهل لكم في تكمله الدار وتهناي فيها

بارك الله فيكم على الاهتمام وانا كنت متاكدة مراكمش رايحين تخيبو ظني .....

البيت يلي حكيتلكم عليه بيت بابا وماما ربي يطول في عمرهم ...وهما في فرنسا يهبطو ساعات برك ...معندهمش وقت محدد ساعات في الصيف ساعات في الربيع ...كيما هذا العام ميهبطوش في الصيف خاطر خويا عندو الباك ثما في فرنسا والنتيجة حتى اواخر جويلية ورمضان اوائل اوت وبابا امام في مسجد تماك سافي ميهبطوش ......بصح يهبطو في سبتمبر او نوفمبر ....المشكل كي يهبطو يتلايمو خواتاتي الخرين ...وخايفة من المشاكل خصوصا مع مرت خويا ....نحكيلكم البارح بنتي تهاوشت مع بنتها عادي كي كامل الولاد .....لوكان تشوفو واش عملت .....حق ربي تهربو ..انا واقفة وهي تسب في بنتي وتلعن في الراصة نتاعها ونتاعي ....والله العظيم منطقت بكلمة قلت عيب نضحك علنا الناس ويلوموني انا يقولولي وجه والديك ....فهمتوني ...هذىي قطرة من بحر غير البارح واش نحكيلكم على الباقي .....ولوكان نكمل للولادي صافي عام كامل خاطر مستحيل نبدلهم نص العام .....هيا واش ندير نصبر وانا الخاسرة الاولى خصوصا مع خويا ومرتو .....ولا نهرب ونرح نطيش ولادي في اخر الدنيا عرش يبهدل ....زيدو دبرو علي واسمحولي اذا قلقتكم معايا

يا اختي ام توبة ربي معاك حاجة ترفع الضغط بصح اسمحيلي هذا بيت باباك ويماك
انت تسالي فيه اما مرت خوك اتجاهليها فقط هي راهي دير كيما هاك باه تكرهي انت وتخرجي من تماك
وما تغيريش سكنك كيما قلتي تروحي للعرش ما تلخبطيش دراسة ولادك وزيد قلت منطقة نائية ما فيها والو اصبري شوية في جال وليداتك بيلاما ربي فرج وخلصتي سكنتك

ربي يفرج عليك حبيبتي

يا اختي ربي يصبركويفرج عليك والله راني حاسة بيك
بصح ديري كيما قالولك لبنات وبربي تفرج مابقى من الياسر غير لقليل
ولوكان عطى ربي هذيكبيت بابا وعندك حق فيها ومرت خوك
ربي يهديها كل الناس عندهم نوع منها صدقيني
لوكان نحكيلك واش صرا في امي حتى هي هك
18 سنة وهي في الضغط وهاوفرج ربي
الصبر مفتاح الفرج اختي
ربي يفرج عليك

لله يفرج على الكل

بارك الله فيكن ويعطيكن الصحة والله خففتو علي بزاااااااف بزاااااف وكنتو عند حسن ظني


يعطيكم الصحة وان شاء الله ربي يكبرلي قلبي ويصبرني على كلشي يارب

انشاء الله ان شاء الله اختي
وسعي بالك واستعيني بالله
وبربي تفرج عليك كيما الساعة هاذي
قلبي ودعواتي اليك

بارك الله فيكن والله غير راكن كيخواتاتي والعكس ارتحتلكن اكثر منهن خاطر خفت نفتح الموضوع لاي وحدة منهن ونولي في ادي وجيب الهدرة وانا منحبش المشاكل



يالله يعطيكم الصحة بزاااااف بزااااااف

الله يكون بعونك ام توبه
اصبري على جال اولادك اما زوجه اخوك خليها تهدر واش تحب انت عليك بالحسنى
ربي يفتح عليكم

شكرا لكل من ردت لكني اطرح عليكم اليوم جديد وانتن لومكاني واش تعملي....

مرت اخي كيما قلتلكن نكدية وتموت على المشاكل والله العظيم غير كل يوم تخلق مشكل من العدم وانا نطنش ...عندنا دخلة وحدة كل يوم تاكل ولادي علاه متنحوش صبابطكم برا.....تخيلو برا.....ولانتوراج فيه كيلو متر ...والدرج والكولوا وعندها دخلتها كسع وحدها ويطلعو لي ولادي من بعد قلتلتها الف مرة انا نسيق والله غير بهدلت بيا قدام راجلي


البهرة الكبيرة عادت تخلي حتان يقرب وقت مجي راجلي واش تعمل ؟؟؟؟؟ تخرج تعمل روحها تسيق والله غير عريانة ...بالفيزو فوق الركبة وكل مرة تعهمل عذر باش تنكشف على راجلي وتفضحنا وفعلا ضرك الف مرة صرات حتى هز راجلي قرار انو بمجرد ميخلصو الاولاد الامتحانات نرجعو للعرش ...دارك دارك تستر عارك ....والله غير راني في حالة ميعلم بيها غير ربي

يا اختي ام توبة راكي عايشة مع عوْد كيما حنا نقولو وهذي المرا ما يهدرش معاها خوك اللي هو راجلها وينهيها ويحطها عند حدها
والله اول مرة نسمع بلي مرت الاخ تعمل في حماتها هاك
ربي يهديها وتكملي سكنتك بسرعة ان شاء الله وتريحي منها

السلام عليكم
ربي يهون عليك يا أختي بصح من عندي المشاكل ألي من هذا النوع تضر بالدين أولا و انسانيتك انت وأسرتك والحل نضن عند خوك يدير حل لزوجته يقوللها هذا رزقي أنا وخاوتي لأنها للأسف قاعدة تقطع علاقة رحم وكيما نعرفو صعيبة بزاف عند ربي أنا متفكرة نهار مرت خويا حبت تدير مشاكل مع مرت خويا الاخرى قاللها خويا هذه حاجة بيني بين خويا مادام ما اتضريتيش ما عندك ما دخلك
نضن لازم تعرف مرت خوك بلي ربي فوق الجميع وتفهموها بكل لين وقوة شخصية تبقى مراة وهمها الاول أولادها وزوجها وربي يهدي الجميع ويجعل آخر صبرك فرج يا أختي

السلام عليكم....
أختي أم توبة عليك بهذا الدعاء:
اللهم إني أشكو إليك ضعف قوتي و قلة حيلتي و هواني على الناس ، أنت رب المستضعفين و أنت ربي لا إله الا أنت، الى من تكلني إلى عدو يتجهمني أم الى عدو ملكته أمري، ان لم يكن بك سخط علي فلا أبالي غير أن عافيتك هي أوسع لي ، أعوذ بنور وجهك الكريم الذي أضاءت له السماوات و الأرض و أشرقت له الظلمات ، و صلح عليه أمر الدنيا و الاخرة من أن يحل علي غضبك أو ينزل علي سخطك ، لك العتبى حتى ترضى و لا حول و لا قوة لنا إلا بك

بارك الله فيكن كامل وفيك يااختي توبة والله اني اعرف ان لاملجا ولامنجا من كل مشكل الا الى الله وهو ملاذي في كل شيء لكن فعلا مايحدث معي فاق قدرتي على الاحتمال


ويااخواتي على اخي المسكين المغلوب فعلا على امره ...والله هو عيى معاها قبلنا ومانيش حابة نعاودلوا يرتاكب فيها كاش جريمة خاطر شحال من مرة حذرها وضربها على تصرفاتها معاه ومع كل الناس خصوصا فاميلتو واكثر شيء حذرها منو خروجها من بيتها بالسروال والله العظيم واحد المرة تصادف هو وياها طالعة لي بالسروال قريب قتلها نوليت نحجز ونقولو راجلي في ولاية اخرى ...بالكذب باش نتفادى المشاكل ومنكونش انا السبة

ضرك معندوش بزاف ملي غضبها ونوى يطلقها رغم انو عندها زوج ولاد ....ومنين قلبتهالو يما وبابا وحتى والديهخا ناس ملاح حلف بلي مازالتلها غلطة ويطلقها وقالهالها قدام الرجال والجماعة ...ومنين قدر ربي ورجع قالهالي ليا اسمحيلي المكتوب يلي رجعني بصح نوصيك كبري قلبك مع مرتي خاطر والله غير راني على الشعرة ونتلفها ...قالهالي بالحرف الواحد شبعت مرار

صافي انا مانيش حابة نكون انا السبة ...هو ماشي متهني معاها بلا بي بصح لوكان نعاودلو واش راهي تعمل معايا وقدام راجلي كيفاه تنكشف والله مبقات تزيد عندو يوم .....وفي المستقبل الناس والفاميلا يلوموني انا صح ؟؟؟؟

يقولولي سباب خراب بيت خوك ....معندوشوين يروح بصح انا لاشتات العرش ...المهم ندرق راسي وخفت من حوايج اكبر ....والله غير قادرة تقلوا تبلاني راجل اختك ...ونوليو في القطيعة نتاع الصح والقتيلة


ياربي متنساونيش بدعوة الخير واذا انقطعت عليكن فلسبب واحد هاو معروف واسمحولي

الله معاكي حبيبتي ام توبة وربي يفرج عليك اختي

ربي معاك اختي ام توبة ما عندي واش نقولك حببيتي

حسب ما فهمت هذي مرت خوك ماتخاف ربي ما تحترم زوجها ربي يهديها و يفرج عليك ، و يعطيك الصحة لي راكي متحملتها على جال خوك أنت بنت أصل و ان شاء الله ربي يعطيك على حساب نيتك

مساء الخير عليكن كامل ويعطيكن الف صحة وعافية وبركة وجزاكن الله عني كل خير لدعواتكن الصادقة وتفاعلكن معي


ومشكورة ياام مصعب على الاهتمام والنصيحة وصدقيني والله غير هاذاك واش راني نعمل معاها ...راني نسلتلها باش متخلقليش مشاكل وكيما تقول ننعملها وديما عندي متهبط غير ساعات وانا مكبرة قلبي ونقول وجه والديا وراه يجي النهار يلي نتفرقو ونخلي عرضي زين

اما عن كونها ماهيش متهنية مع خويا والله العظيم ماهو كيعاد خويا بصح غير دايرلها الجنة في صحن وميطلب منها والو غير القدر والسترة وهذا الشي صعيب عليها ....خاطر بصراحة راه يسلك في الغلطة نتاعو ...الرسول عليه الصلاة والسلام حذرنا من خضراء الدمن وخويا غواه الزين خليه يسلك ورانا كامل نسلكو معاه رغم انو والديا عارضوه بصح صحح وجهو وجابها وقال نغير فيها بصح المسكين هو يلي تغير ...المهم خلاصة القول انا مرت خويا معندهاش بزاف ملي لبست الحجاب ....وبالقوة وزيدي عندها 3 خاوتها مهابل ...يعني من عيلة ميعلم بيها غير ربي بصح المكتوب يلي يمشي في الناس ووالديها الحق ناس ملاح بزاف بزاف بصح هي حتى هوما ضاغطينها ومقدرولهاش ...حبيتو اختكم ام توبة تقدرلها خخخخ


واش نقول ربي يهدي مخلق برك ....

المهم اخر قرار خرجا ليه انا وراجلي اننا نروحو للعؤش نكملوا واش كتبلنا ربي ثماك ....والسترة ولا التبهدايل والمشاكل ويعطيكم الصحة بزاف بزاف واسمحولي عمرتلكم ريسانكم بمشكيلتي ...