يــــــا بــــــــــابـــــــ ــا
هاذ الدنيا حـوالها غــــــريبــة * * مــــا نعملوش قيــمة للحاضر
ونهار تــروح الحاجة وتتخـبى * * لتم الي نعملولها قــيمة وقدر
كم من واحد عاش في غربـة * * كان مشتاق مع ولادو يهـــدر
مشـتــاق يسـمـــع كـــلــمة بابا * * ويقعد في مايدة معاهم ويڤصر
بعد مـــا شــقى وتعب أو ربى * * وعطـــالهم كامل واش قدر
بعد ما حمل شحال من ضربة * * ورفد كلشي في قلبو وصبر
خدم والخدمة كانت صعيـــبة * * وكان كي يلحق راس الشهر
يروح يجــيــب هـاذيك الكاتبة * * ويجي يمدهالهم ليهم فاللاخر
الي يطلبــــوها كـــانت تتـلبـى * * وكان عليهم عمــرو ما يتأخر
رافد في يدو ورقة مكتــوبة * * ويدبر راسو منيــــن يدبر
كان يعطيــــهم وبلا محاسبة * * وســـاعات حــتى هو ما يفطر
غير باش ذاك الدورو يتخبى * * وولادو برك ما يباتوش للشـر
هات يلبسوا الحـــاجة الشابة * * وهات المحفظة ديالهم تتعمر
وهات ما تخصهم حتى لعبــة ** والحاجة الي يطلبوها تحضر
ولا كاش ما تكون كاش سبــة ** ولاّ مـــرض لا ربــــــي قدّر
ولا كاش ما تلـــحق منـــاسبة * * كــــان باباهم دايما حـــــاضر
المهــــم برك وليــــدو يتربـى * * فالعز وفالخير باش كي يكبر
يتكل عليـــــه عنــد العقــوبة * * ويصيبو كيما رباه فـــالصغر
المهم ربـــاهم حبــــة بحبــــة * * عمللـــهم كــــــامل واش قدر
زرع فيـــهم لحنـــان والمحبة * * لكن حصد شي وحـداخر
ولادو كبروا وطلعولو ذيوبا ** وهذاك الخيــر ردوهــولو شر
بيـــن يديـــهم ولا لعــــــبة * * ولا وليــــدو بيــــه يتمسخر
ولا قافز ويقـــــــــولك بابا * * عبد قـــــديم مزال متــاخر
ولا لما يشــــوفو يتــــخبى * * ويحشم بيــه قدام وحدوخر
يقوللو يا شيخ في عوض بابا* * هذا ايلا كان معـــاه يهدر
ولوخر ولا صحـيـح أو ربّى * * الرقبة والــذراعتين والصدر
رفد يدو وضــــــربو ضربة * * صعيبة بزاف بــاش تتنغفر
ولوخرا كبرت ولات شــابة ** ولات تضرب باباها فالظهر
في غيابو تعمل ما راهي حـابة ** ولا ساعـــــات قدامو تجهر
ووليدو لاخر راح للغــربة * * عجبوا لزين نتــــــاع لقور
عجبو الزهو نتاع أوروبا * ** وما زادش بـــــان عليه خبر
ونسى حتى كيفاش تربى * * عمبالو وحدو هكذا... كبر
وستخسر في باباه كـــتيبة * * * كلمة يطمنو بيها ويصـــــبّر
وخوهم لاخر صاب السبة * ** قـــــالك الديق وبــابانا كبر
راح رفـــــــدو يـا عجابة * * * لدار العجزة بعد الـــعمر
لما قالـــوا أرواح يــابابا * * * * باباه تبعو وما جـابش خبر
عمبالو رايح يديــه للكعبــة * * * * ولا يـــديه بــــاش يعتامر
هاذ الدنيا حوالــها غــــريبة ** ** مـــانعملوش قيــمة للحاضر
ونهار تروح الحاجة وتتخبى * * * لتم الي نعملــولها قيمة وقدر
واحد النهار صرات مصيبة ** * باباهم مات وجــاهم لخبر
جاو وتلايمو كامل في رحبة * * * وتعاونوا باش حفرولوا قبر
قـــدام النـــاس بناولوا قبة * * * وعمروهالو كامل بالنواور
كان حي كان مشتـــــاق حبة * * * كي مات علقولو عرجون تمر
عليها حبيت نقولك يــابابا * * * أنك مــاراكش جــــايب خبر
بلـــي نكنــــلك واحد المحبة *** * مانكنهاش لانسان واحـــد آخر
حبيت نقعد معاك في رحـبة * * * حبيت نضمك لهـــــاذ الصدر
حبيت نقولك كلمة شـــــابة * * * دركا يا بابا قدامك حاضر
كلمة جاتني شويا صعـــيبة ** * بـــلاك حشـــــمة وبالاك قدر
ولا بـــالاك ولات غريـــبة * * * ولات كلـــمة عيب تتنهدر
ولا بـــالاك ولات لمـــحبة * * * حـــاجة تتمد بلا ما تظهر
كيما لهديـــــة لمّـــا تتخبى * * * أو تتغلّف أو تتمـــد فالستر
ولا بــــالاك لازم يتــــربى * * * أو يتعود عليــــها مالصغر
المهم ديــر في بــالك يا بابا * * * ما عرفتش برك كيفاش نعبّر
وفاتت كــــــم من منـــاسبة * * * كم من عام وكم من شهر
كم من شمعة وكم شيـــــــبة * * * كم من مرة ما قدرتش نهدر
هاذ الكلمة جـــاتني صعيبة ** * من صاب نولي لأيام الصغر
كنت نقولها ضحكة ولعبــــة ** * نقولها وبلا ما نجيب خبر
نشفى لــــما كــــــنت نتربى ** * يسقسوني شكون تحب كثر
دايما نحصل فـــــالإجــــابة ** * ما بين الشمس أو بين القمر
يما ونتايا شويا صعيــــبة ** * نفكر ونفكر من بعد نـهدر
يما قد السمـــــا ويــــا بابا ** * نتــــايا نحبـــــــك قد لبحر
يا بابا دعوتك مستجــــــابة ** * * عند ربي ما عندهاش ستر
لما نكون في وسط الغابـة ** * * فالليل دعوتك عليا تنور
ولما نكون في وسط الذيابا *** * بدعوتك يا بابا الأمور تتيسر
مادمت حي ما تزيدش تتخبى ** نحبك ونقولهالك قد ما نقـدر
ويلا كان قدّر ومتت يا بابا ** نجي ونجيبهالك حتى للــــقبر
الجمعة مايو 18, 2018 4:54 pm من طرف فاطمة تقوى
موضوع: يا بابا 
